கடந்த தி.மு.க ஆட்சியில் பள்ளிக்கல்வித்துறை அமைச்சராக பதவி வகித்தவர் அன்பில் மகேஸ் பொய்யாமொழி. திருவெறும்பூர் தொகுதியில் இரண்டு முறை சட்டமன்ற உறுப்பினராகத் தேர்ந்தெடுக்கப்பட்ட இவருக்கு, கடந்த ஆட்சியில் அமைச்சர் பொறுப்பு வழங்கப்பட்டது. இதுபோன்ற சூழலில், நடந்து முடிந்த 2026 சட்டப்பேரவை தேர்தலில் தோல்வியைத் தழுவினார்.

முன்னாள் அமைச்சரான அன்பில் மகேஸ், தற்போது திருச்சி தி.மு.க தெற்கு மாவட்டச் செயலாளராக இருந்து வருகிறார். அதுமட்டுமின்றி, சட்டமன்ற எதிர்க்கட்சித் தலைவர் உதயநிதி ஸ்டாலினின் நெருங்கிய நண்பராகவும், குடும்ப நண்பராகவும் உள்ளார்.

தனியார் பள்ளிகளுக்கு அரசு அனுமதி, நிரந்தர அங்கீகாரம் மற்றும் சட்டப்பூர்வ அனுமதிகளைப் பெற்றுத் தருவதாகக் கூறி ரூ.100 கோடி வரை மோசடி செய்ததாக புகார் எழுந்துள்ளது. இது தொடர்பாக வழக்குப் பதிவு செய்துள்ள மத்திய குற்றப்பிரிவு போலீசார் (Central Crime Branch police) விசாரணை நடத்தி வருகின்றனர். ஏற்கனவே, தமிழக தனியார் பள்ளிகள் சங்கத்தின் தலைவரும், தி.மு.க பிரமுகருமான பி.டி. அரசகுமாரை கைது செய்த மத்திய குற்றப்பிரிவு போலீசார், அவரை குண்டர் தடுப்பு சட்டத்தில் சிறையில் அடைத்துள்ளனர். மேலும், அரசகுமாருக்கு உடந்தையாக இருந்த அவரது உறவினர்களான மதுரையைச் சேர்ந்த ஆரோக்கியராஜ் என்ற ராஜா மற்றும் திருச்சியைச் சேர்ந்த சுரேஷ் இருவரும் கைது செய்யப்பட்டனர். அசரகுமாரிடம் நடத்தப்பட்ட விசாரணையின் தொடர்ச்சியாகவே தற்போது சோதனைகள் தீவிரப்படுத்தப் பட்டுள்ளதாகக் கூறப்படுகிறது.

அதன்படி, திருச்சி தென்னூர், அண்ணா நகரில் உள்ள அன்பில் மகேஸ் பொய்யாமொழியின் இல்லத்தில், இன்று காலை முதலே மத்திய குற்றப்பிரிவு போலீசார் தீவிர சோதனையில் ஈடுபட்டு வருகின்றனர். இதில், தனியார் பள்ளிகளிடம் அனுமதி வழங்குவதில் லஞ்சம் பெறப்பட்டதா? முறைகேடுகள் நடைபெற்றதா? என்பது குறித்த ஆவணங்களை மையமாகக் கொண்டு, போலீசார் விசாரித்து வருகின்றனர்.

இதற்கிடையே, அன்பில் மகேஸ் இல்லத்தில் நடைபெறும் சோதனை குறித்து தகவல் அறிந்த தி.மு.க-வினர், அவரது வீட்டிற்கு முன்பாக குவிந்து வருவதால் பரபரப்பு ஏற்பட்டுள்ளது. இதனால், பலத்த போலீஸ் பாதுகாப்பு ஏற்பாடுகள் செய்யப்பட்டுள்ளன.

திருச்சியில் உள்ள வீடு மட்டுமின்றி, சென்னை உள்ளிட்ட அன்பில் மகேஸுக்கு தொடர்புடைய 6 இடங்களில் ஒரே நேரத்தில் இந்த சோதனை நடத்தப்பட்டு வருகிறது. 6 இடங்களிலும் நடைபெற்று வரும் சோதனை முழுமையாக நிறைவடைந்த பின்னரே, கைப்பற்றப்பட்ட ஆவணங்கள் மற்றும் பிற ஆதாரங்கள் குறித்த முழுமையான விவரங்கள் தெரியவரும் என போலீசார் தரப்பில் தெரிவிக்கப் பட்டுள்ளது. இந்த சோதனையின் முடிவில் கிடைக்கும் ஆவணங்கள் மற்றும் பணப் பரிவர்த்தனை விவரங்களின் அடிப்படையில் வழக்கில் மேலும் யார் யாருக்கு தொடர்புள்ளது என்பது குறித்து மத்திய குற்றப்பிரிவு போலீசார் அடுத்தகட்ட விசாரணையை மேற்கொள்ள உள்ளனர்.

கே.என். நேருவுக்கு அனுமதி மறுப்பு இதற்கிடையே, தகவல் அறிந்த தி.மு.க முதன்மைச் செயலாளரும், முன்னாள் அமைச்சருமான கே.என். நேரு, தென்னூரில் உள்ள அன்பில் மகேஸின் வீட்டிற்கு நேரில் சென்றுள்ளார்.

ஆனால், போலீசார் அவரை வீட்டிற்குள் செல்ல அனுமதிக்க மறுத்ததாக கூறப்படுகிறது. இதையடுத்து, செல்போன் மூலம் வீட்டிற்குள் இருந்த கட்சி நிர்வாகியை தொடர்பு கொண்டு பேசிய அவர் அங்கிருந்து புறப்பட்டு சென்றதாகக் கூறப்படுகிறது.

இதுகுறித்து செய்தியாளர்களிடம் பேசிய கே.என். நேரு, “தி.மு.க-வில் சிறப்பாகச் செயல்படும் நபர்களைக் குறிவைத்து, வேண்டுமென்றே பயமுறுத்தும் வகையில் விஜய் அரசு இந்த சோதனை நடத்தி வருகின்றனர். திமுகவில் தீவிரமாகச் செயல்பட்டு, மக்கள் மத்தியில் யாரெல்லாம் பிரபலமாக இருக்கிறார்களோ, அவர்களை எல்லாம் குறிவைத்து விஜய் அரசாங்கம் இதுபோன்ற சோதனைகளை நடத்தி வருகிறது.

இந்த நடவடிக்கையைப் பழிவாங்கும் நடவடிக்கையாகவே நாங்கள் பார்க்கிறோம். நீதிமன்றத்தின் வாயிலாக நாங்கள் குற்றமற்றவர்கள் என்பதை நிரூபித்து வெளியே வருவோம்” எனத் தெரிவித்தார்.

வங்கிக் கணக்குகள் முடக்கம்

இச்சம்பவம் குறித்து காவல்துறை வெளியிட்டுள்ள அறிக்கையில், “இந்த வழக்கின் விசாரணையை தீவிரப்படுத்திய மத்திய குற்றப்பிரிவு போலீசார் தமிழகம் முழுவதும் பல்வேறு இடங்களில் விசாரணை மேற்கொண்டனர். இதுவரை 250-க்கும் மேற்பட்டோரிடம் விசாரணை நடத்தப்பட்டுள்ளது. பள்ளிக்கல்வித்துறை மற்றும் அதனைச் சேர்ந்த பல்வேறு அரசு அலுவலர்களிடமும் விசாரணை நடத்தப்பட்டதுடன், அதுதொடர்பான அரசு ஆவணங்களும் கைப்பற்றப்பட்டுள்ளன.

இதுவரை 177 தனியார் பள்ளிகள் பாதிக்கப்பட்டதாகவும், அவர்களிடம் இருந்து பல கோடி ரூபாய் வசூலிக்கப்பட்டு நம்பிக்கை மோசடி செய்யப்பட்டிருப்பது முதற்கட்ட விசாரணையில் தெரியவந்துள்ளது. தொடர்ந்து புகார்கள் பெறப்பட்டு வருகின்றன. நிதி மோசடி தொடர்பான விசாரணையில் குற்றம் சாட்டப்பட்டவர்கள் அவர்களது குடும்பத்தினரின் வங்கிக் கணக்குகள் முடக்கப்பட்டுள்ளன.

குறிப்பாக, அரசகுமார் மற்றும் அவரது குடும்பத்தினருடன் தொடர்புடைய 20 வங்கிக் கணக்குகளும், வழக்கில் தொடர்புடைய மற்றொரு முக்கிய நபரான முத்துக்குமாருடன் தொடர்புடைய 29 வங்கிக் கணக்குகளும் முடக்கப்பட்டுள்ளன. அந்த கணக்குகளில் நடைபெற்ற நிதிப் பரிவர்த்தனைகள் தொடர்பாக தொடர்ந்து விசாரணை நடந்து வருகிறது.

விசாரணையில் சிக்கிய ஆதாரங்கள்

விசாரணையின் பல்வேறு கட்டங்களில் குற்றம் சாட்டப்பட்டவர்களின் குடியிருப்புகள், அலுவலகங்கள், பள்ளி வளாகங்கள் மற்றும் பள்ளிக்கல்வித்துறை இயக்குநரகம் அமைந்துள்ள DPI வளாகம் உள்ளிட்ட பல்வேறு இடங்களில் சோதனைகள் நடத்தப்பட்டுள்ளன.

அப்போது, குற்றச்செயலுடன் தொடர்புடையதாக கருதப்படும் ஆவணங்கள், தனியார் பள்ளிகள் தொடர்பான பதிவுகள், அரசு அலுவலகங்களுக்கு அளிக்கப்பட்ட மனுக்கள் மற்றும் பிரதிநிதித்துவ ஆவணங்கள், நிதிப் பரிவர்த்தனை தொடர்பான பதிவுகள், கைப்பேசிகள், கணினிகள், ஹார்டு டிஸ்க்குகள் உள்ளிட்ட டிஜிட்டல் மற்றும் மின்னணு ஆதாரங்கள் கைப்பற்றப்பட்டுள்ளது. கைப்பற்றப்பட்ட ஆவணங்கள் மற்றும் மின்னணு ஆதாரங்கள் வங்கிப் பரிவர்த்தனைகள் சாட்சிகளின் வாக்குமூலங்கள் ஆகியவற்றை ஒப்பிட்டு, மோசடியில் சம்பந்தப்பட்ட ஒவ்வொரு நபரின் பங்கு குறித்து மத்திய குற்றப்பிரிவு போலீசார் தொடர்ந்து விசாரணை நடத்தி வருகின்றனர்.

வழக்குப் பதிவு

அதனடிப்படிப்படையில் அப்போதைய பள்ளிக்கல்வித்துறை அமைச்சராக இருந்த அன்பில் மகேஸ் பொய்யாமொழிக்கு இந்த விவகாரத்தில் தொடர்பு இருப்பது தெரியவந்துள்ளது. இதையடுத்து அவர் மீது ஊழல் தடுப்பு சட்டத்தின் கீழ் வழக்குப்பதிவு செய்யப்பட்டுள்ளது.

அதன் தொடர்ச்சியாகவே, சென்னை மற்றும் திருச்சியில் உள்ள 4 இடங்களிலும் அவரது உதவியாளர் வாலாடி கார்த்திக்குக்கு சொந்தமான சென்னை மற்றும் திருச்சியில் உள்ள 2 இடங்களிலும் என மொத்தம் 6 இடங்களில் ஒரே நேரத்தில் சோதனை நடந்து வருகிறது” என தெரிவிக்கப்பட்டுள்ளது.

இதற்கிடையே, தி.நகர் பகுதியில் உள்ள அன்பில் மகேஸ் அலுவலகம் ஒன்று பூட்டப்பட்டிருப்பதால், அதன் சாவி யாரும் எடுத்துவரவில்லை எனக் கூறப்படுகிறது. இதனால், பூட்டை உடைத்து சோதனை நடத்த குற்றப்பிரிவு போலீசார் திட்டமிட்டு வருகின்றனர்.

கவுந்தப்பாடி பத்திரப்பதிவு அலுவலகத்தில் நிலத்தை பதிவு செய்ய ரூ.7 லட்சம் லஞ்சம் கேட்பதாக எழுந்த புகாரின் பேரில், ஈரோடு மாவட்ட லஞ்ச ஒழிப்புத்துறை போலீசார் மேற்கொண்ட நடவடிக்கையில் கவுந்தப்பாடி சார்பதிவாளர் மற்றும் பத்திர எழுத்தர் என இருவர் கைது செய்யப்பட்ட சம்பவம் பரபரப்பை ஏற்படுத்தியுள்ளது

.

ஈரோடு மாவட்டம், சித்தோடு அருகே உள்ள ராயர்பாளையத்தைச் சேர்ந்த விவசாயி தனது பத்திரத்தை கிரையம் செய்வதற்காக கவுந்தப்பாடி சார்பதிவாளர் அலுவலகத்தை அணுகியுள்ளார்.
அப்போது, பத்திரப்பதிவு பணியை மேற்கொள்வதற்காக ரூ.7 லட்சம் லஞ்சம் கேட்டதாக சார்பதிவாளர் சங்கர் (42) மீது, ஈரோடு மாவட்ட லஞ்ச ஒழிப்புத்துறை போலீசாரிடம் புகார் அளிக்கப்பட்டது.

புகாரின் அடிப்படையில் ஈரோடு மாவட்ட லஞ்ச ஒழிப்புத்துறை போலீசார் நடவடிக்கையில் இறங்கினர், கவுந்தப்பாடி சார்பதிவாளர் அலுவலகத்தில் கண்காணிப்பு நடவடிக்கையில் ஈடுபட்டு வந்தனர். இதையடுத்து பாதிக்கப்பட்ட விவசாயி லஞ்சம் வழங்குவதற்காக ரூ.7 லட்சம் பணத்துடன் கவுந்தப்பாடி சார்பதிவாளர் அலுவலகத்துக்குச் சென்றுள்ளார்,
அப்போது சார்பதிவாளர் சங்கர் நேரடியாக பணத்தைப் பெறாமல், வெற்றி (30) என்ற பத்திர எழுத்தர் மூலம் பணத்தைப் பெரும்பொழுது லஞ்ச ஒழிப்புத் துறையினர் கையும் களவுமாக பிடித்தனர். இதனைத் தொடர்ந்து, லஞ்ச ஒழிப்புத்துறை போலீசார் இருவரையும் கைது செய்தனர்.

அலுவலகத்தில் தொடர்ந்து விசாரணை

கைது செய்யப்பட்ட சார்பதிவாளர் சங்கர் மற்றும் பத்திர எழுத்தர் வெற்றி ஆகியோரிடம், கவுந்தப்பாடி சார்பதிவாளர் அலுவலகத்திலேயே லஞ்ச ஒழிப்புத்துறை போலீசார் தொடர்ந்து விசாரணை மேற்கொண்டு வருகின்றனர்.

பத்திரப்பதிவு தொடர்பாக லஞ்சம் கேட்கப்பட்டதாக அளிக்கப்பட்ட புகாரைத் தொடர்ந்து, திட்டமிட்டு நடத்தப்பட்ட இந்த நடவடிக்கையில் இருவர் கைது செய்யப்பட்டிருப்பது குறிப்பிடத்தக்கது. மேலும், பணியில் இருக்கும் பல சார்பதிவாளர்கள் எழுத்தாளர்கள் மூலம் மாதந்தோறும் பல லட்சம் ரூபாய் லஞ்சம் பெறுவதாக பொதுமக்கள் பொதுமக்கள் குற்றம் சாட்டுகின்றனர்.

கோவை மாவட்ட காவல் எல்லைக்குட்பட்ட FL-2 மற்றும் FL-3 மதுபானக் கூடங்களின் உரிமையாளர்கள் மற்றும் நிர்வாகப் பிரதிநிதிகளுக்கான ஆலோசனைக் கூட்டம், கோவை மாவட்ட காவல் அலுவலகத்தில், மாவட்ட காவல் கண்காணிப்பாளர் பவன் K.ரெட்டி, இ.கா.ப.,தலைமையில் நடைபெற்றது.

இக்கூட்டத்தில், அனைத்து FL-2 மற்றும் FL-3 மதுபானக் கூட உரிமையாளர்களும் உரிமத்தில் குறிப்பிடப்பட்டுள்ள நிபந்தனைகள், அரசு விதிமுறைகள் மற்றும் நடைமுறைகளை கண்டிப்பாகப் பின்பற்ற வேண்டும் என மாவட்ட காவல் கண்காணிப்பாளர் அறிவுறுத்தியுள்ளார். மேலும், மதுபானக் கூடங்களின் உரிமையாளர்கள் மற்றும் நிர்வாகத்தினர் பொறுப்புடன் செயல்பட்டு, சட்டம்-ஒழுங்கு பிரச்சனைகள் மற்றும் அசம்பாவித சம்பவங்கள் ஏற்படாதவாறு உரிய முன்னெச்சரிக்கை நடவடிக்கைகளை மேற்கொள்ள வேண்டும் என வலியுறுத்தப்பட்டது.

குறிப்பாக,

1. உறுப்பினர்கள் (Members) அல்லாத நபர்களுக்கும், 21 வயதிற்குட்பட்ட நபர்களுக்கும் எந்தச் சூழ்நிலையிலும் மதுபானம் வழங்கக்கூடாது. குறிப்பாக வெளிமாநிலங்களைச் சேர்ந்த உறுப்பினர் அல்லாத நபர்கள் தொடர்பாக உரிய கவனம் செலுத்தப்பட வேண்டும். மேலும், உறுப்பினர் விவரங்கள் உள்ளிட்ட அனைத்து பதிவேடுகளும் முறையாகவும் புதுப்பிக்கப்பட்ட நிலையிலும் பராமரிக்கப்பட வேண்டும்.
2. மதுபானக் கூட வளாகத்திற்குள் அல்லது அதனைச் சுற்றியுள்ள பகுதிகளில் நடைபெறும் சிறிய தகராறு, வாக்குவாதம், சந்தேகத்திற்கிடமான நடவடிக்கை அல்லது வேறு ஏதேனும் அசம்பாவித சம்பவம் குறித்து உடனடியாக சம்பந்தப்பட்ட காவல் நிலையத்திற்கு தகவல் தெரிவிக்க வேண்டும்.
3. மதுபானக் கூடத்தின் உட்புறம், வெளிப்புறம், நுழைவு மற்றும் வெளியேறும் பகுதிகள் உள்ளிட்ட முக்கிய இடங்கள் முழுமையாகப் பதிவாகும் வகையில் CCTV கேமராக்கள் பொருத்தப்பட்டு, அவை முறையாக செயல்படும் நிலையில் பராமரிக்கப்பட வேண்டும். CCTV பதிவுகள் குறைந்தபட்சம் மூன்று மாதங்களுக்கு பாதுகாத்து வைக்கப்பட வேண்டும். சட்டப்பூர்வ தேவைக்காக காவல்துறையினர் கோரும் போது அவை வழங்கப்பட வேண்டும்.
4. உரிமம் பெற்ற வளாகத்திற்குள் அருந்துவதற்காக அனுமதிக்கப்பட்ட மதுபானங்களை எந்தச் சூழ்நிலையிலும் வளாகத்திற்கு வெளியே எடுத்துச் செல்ல அனுமதிக்கக்கூடாது. மதுபான விற்பனை மற்றும் அருந்துதல் தொடர்பான அனைத்து உரிம நிபந்தனைகள் மற்றும் விதிமுறைகளும் கண்டிப்பாகப் பின்பற்றப்பட வேண்டும்.

மேலும், விதிகளை மீறி செயல்படும் பார்களுக்கு உடனடியாக உரிமம் ரத்து செய்யப்படும் என தெரிவித்துள்ளார்.

கோயம்புத்தூர் மாவட்டத்தில் விதிமுறைகளைப் பின்பற்றாத உணவகத்திற்கு FSSAI சீல் வைத்துள்ளது, மேலும் 12 உணவகங்களுக்கு நோட்டீஸ் அனுப்பியுள்ளது.

மாவட்டம் முழுவதும் நடத்தப்பட்ட சிறப்பு நடவடிக்கையின்போது, இந்திய உணவுப் பாதுகாப்பு மற்றும் தர நிர்ணய ஆணையம் (FSSAI), பல்வேறு விதிமுறைகளைப் பின்பற்றாததற்காக மேட்டுப்பாளையம் சாலையில் உள்ள ஒரு உணவகத்திற்கு சீல் வைத்ததுடன், மேலும் 12 உணவு வணிக நிறுவனங்களுக்கு (FBO) நோட்டீஸ்களையும் வழங்கியது. உணவு ஒழுங்குமுறை ஆணையம், முக்கியமாக உணவகங்களான எட்டு உணவு வணிக நிறுவனங்களுக்கு (FBOs) மேம்பாட்டிற்கான அறிவிப்புகளையும் வழங்கியுள்ளது.
பல்வேறு விதிமீறல்களுக்காக, வெவ்வேறு உணவு வணிக நிறுவனங்களுக்கு மொத்தம் ₹95,000 அபராதத் தொகை விதிக்கப்பட்டது. சரியாகக் கையாளப்படாவிட்டால், உணவுப் பாதுகாப்பு அபாயங்களை ஏற்படுத்தவோ அல்லது எளிதில் மாசுபடவோ அதிக வாய்ப்புள்ள, அதிக அபாயம் நிறைந்த பிரிவில் உள்ள உணவுகளைக் கையாளும் நிறுவனங்களில், அனுராதா மற்றும் 17 உணவுப் பாதுகாப்பு அதிகாரிகள் திடீர் சோதனைகளை மேற்கொண்டனர்.

அதிகாரிகள் ஹோட்டல்கள், உணவகங்கள், பேக்கரிகள், தேநீர்க் கடைகள், நிறுவன சிற்றுண்டிச்சாலைகள், பணியிட சிற்றுண்டிச்சாலைகள், மத்திய சமையலறைகள், கிளவுட் கிச்சன்கள், தங்கும் விடுதிகள் மற்றும் கிளப்புகள் உள்ளிட்ட 462 நிறுவனங்களை ஆய்வு செய்தனர்.

ஒரு உணவகம் மிகவும் சுகாதாரமற்ற முறையில் இயங்கியது கண்டறியப்பட்டதை அடுத்து, அதற்கு சீல் வைக்கப்பட்டதாக Dr.அனுராதா கூறினார். குறைபாடுகளைச் சரிசெய்ய அதற்கு 14 நாட்கள் அவகாசம் வழங்கப்பட்டது. தடைசெய்யப்பட்ட ஒருமுறை பயன்படுத்தும் பிளாஸ்டிக் பொருட்களைப் பயன்படுத்தியதாகக் கண்டறியப்பட்ட ஏழு உணவு வணிக நிறுவனங்களுக்கு தலா ₹5,000 அபராதம் விதிக்கப்பட்டது. FSSAI உரிமம் பெறாமல் வணிகம் நடத்திய இரண்டு உணவு வணிக நிறுவனங்களுக்கு தலா ₹10,000 அபராதம் விதிக்கப்பட்டது.

சுகாதாரமற்ற சூழ்நிலையில் தங்கள் நிறுவனத்தை நடத்திய நான்கு உணவு வணிக நிறுவனங்களுக்கு தலா ₹10,000 அபராதம் விதிக்கப்பட்டது.

தமிழ்நாட்டில் காலியாக உள்ள மதுராந்தகம், தாராபுரம் ஆகிய இரண்டு தொகுதிகளுக்கு அக்டோபர் 6-ஆம் தேதி இடைத்தேர்தல் நடைபெறவுள்ளது என்று இந்திய தேர்தல் ஆணையம் இன்று அறிவித்துள்ளது.

2026 சட்டமன்ற தேர்தலில் தவெக தலைவரும் முதலமைச்சருமான விஜய் திருச்சி கிழக்கு, பெரம்பூர் ஆகிய 2 தொகுதிகளிலும் போட்டியிட்டு, இரு தொகுதிகளில் வெற்றி பெற்றார். இதையடுத்து திருச்சி கிழக்கு தொகுதி சட்டமன்ற உறுப்பினர் பதவியை அவர் ராஜினாமா செய்தார். அதைத் தொடர்ந்து, அதிமுக சார்பில் போட்டியிட்டு வெற்றி பெற்ற மரகதம் குமரவேல் (மதுராந்தகம்), எஸ்.ஜெயக்குமார் (பெருந்துறை), பி.சத்யபாமா (தாராபுரம்), இசக்கி சுப்பையா (அம்பாசமுத்திரம்), சி.விஜயபாஸ்கர் (விராலிமலை), எம்.ஆர்.விஜயபாஸ்கர் (கரூர்) ஆகியோர் அடுத்தடுத்து தங்கள் எம்எல்ஏ பதவியை ராஜினாமா செய்துவிட்டு தவெகவில் இணைந்தனர். இதனால், இந்த 7 தொகுதிகளும் காலியானதாக அறிவிக்கப்பட்டது.

இந்நிலையில், காலியாக உள்ள இந்த 7 தொகுதிகளில் தாராபுரம், மதுராந்தகம் தொகுதிகளை தவிர மற்ற 5 தொகுதிகளிலும் தேர்தலை நடத்த எதிர்ப்பு தெரிவித்து பல்வேறு தரப்பு சார்பாக உயர் நீதிமன்றத்தில் வழக்கு தொடரப்பட்டது. இந்த வழக்குகளை விசாரித்த சென்னை உயர் நீதிமன்றம் இடைத்தேர்தலை நடத்த இடைக்கால தடை விதித்து உத்தரவிட்டது. இதனிடையே, தேர்தல் வழக்கில் சிக்காத தாராபுரம், மதுராந்தகம் சட்டமன்ற தொகுதிகளுக்கான இடைத்தேர்தல் தேதியை தேர்தல் ஆணையம் தற்போது வெளியிட்டுள்ளது. அதன்படி அக்டோபர் 6-ஆம் தேதி இந்த இரண்டு தொகுதிகளிலும் இடைத்தேர்தல் நடைபெறவுள்ளது.

இடைத்தேர்தல் அறிவிப்பு

வேட்புமனு தாக்கல் தொடக்கம் – செப்.9
வேட்புமனு தாக்கல் கடைசி நாள் – செப்.16
வேட்புமனு பரிசீலனை – செப்.17
வேப்புமனு திரும்ப பெற கடைசி நாள் – செப்.19
தேர்தல் நாள் – அக்.6
வாக்கு எண்ணிக்கை – அக்.9

கோவை கூடலூர் நகராட்சியில் மத்திய அரசால் அறிவிக்கப்பட்டுள்ள திடக்கழிவு மேலாண்மை திட்டம் புதிய விதிகளின்படி, வீடுகள், நிறுவனங்கள் உள்ளிட்ட அனைத்து கழிவு உருவாக்குபவர்களும் குப்பைகளை உருவாகும் இடத்திலேயே நான்கு வகைகளாகப் பிரித்து ஒப்படைக்க வேண்டும் என வலியுறுத்தப்பட்டுள்ளது.

பொதுமக்களிடையே இத்திட்டத்தை நடைமுறைப்படுத்தும் நோக்கில், குறிப்பாக பள்ளி மாணவர்களுக்கு திடக்கழிவு மேலாண்மை குறித்த விழிப்புணர்வை ஏற்படுத்தும் வகையில் பிரச்சாரம் நடைபெற்றது. புதிய விதிகளின்படி குப்பைகள் ஈரக்கழிவு, உலர்க்கழிவு, சுகாதாரக் கழிவு மற்றும் சிறப்பு கவனத்துடன் கையாள வேண்டிய கழிவு என நான்கு பிரிவுகளாகப் பிரிக்கப்பட வேண்டும்.

ஈரக்கழிவுகளில் சமையலறைக் கழிவுகள், காய்கறி மற்றும் பழத்தோல்கள், உணவுக் கழிவுகள் உள்ளிட்ட மக்கும் கழிவுகள் அடங்கும். இவை உரமாக்குதல் அல்லது உயிர்வாயு தயாரிப்பு போன்ற முறைகளில் பயன்படுத்தப்படலாம்.

உலர்க்கழிவுகளில் காகிதம், பிளாஸ்டிக், உலோகம், கண்ணாடி உள்ளிட்ட மறுசுழற்சி செய்யக்கூடிய பொருட்கள் அடங்கும்.

சுகாதாரக் கழிவுகளாக பயன்படுத்தப்பட்ட நாப்கின்கள், டயப்பர்கள் உள்ளிட்ட கழிவுகள் தனியாக சேகரிக்கப்பட்டு பாதுகாப்பாக மூடப்பட்டு வழங்கப்பட வேண்டும்.

சிறப்பு கவனக் கழிவுகளில் காலாவதியான மருந்துகள், பேட்டரிகள், பல்புகள், பெயிண்ட் டப்பாக்கள் மற்றும் இதர வீட்டு அபாயகரமான பொருட்கள் அடங்கும். இவை அங்கீகரிக்கப்பட்ட அமைப்புகள் அல்லது குறிப்பிட்ட சேகரிப்பு மையங்கள் மூலம் பாதுகாப்பாக அகற்றப்பட வேண்டும்.

குப்பைகளைத் தரம் பிரிப்பது என்பது தூய்மை பணியாளர்களின் பொறுப்பு மட்டுமல்ல, குப்பை உருவாகும் இடத்திலேயே அதனை முறையாகப் பிரிப்பது ஒவ்வொரு குடிமகனின் பொறுப்பாகும் என்ற கருத்து மாணவர்களுக்கு எடுத்துரைக்கப்பட்டது. மேலும், வீடுகளில் பெற்றோரிடம் குப்பைகளை நான்கு வகைகளாகப் பிரித்து வழங்குமாறு வலியுறுத்துதல், பள்ளி வளாகத்தில் குப்பைகளைத் தரம் பிரித்தல், தேவையற்ற பிளாஸ்டிக் பயன்பாட்டைக் குறைத்தல் மற்றும் சுற்றுச்சூழல் பாதுகாப்பில் பங்கேற்பது போன்ற நடவடிக்கைகள் குறித்து மாணவர்களுக்கு விழிப்புணர்வு ஏற்படுத்தப்பட்டது. தூய்மையான சுற்றுச்சூழலுக்கு அடித்தளம்
குப்பைகளைத் தரம் பிரித்து சேகரிப்பதன் மூலம் மறுசுழற்சி செய்யக்கூடிய பொருட்களை மீட்டெடுக்கவும், மக்கும் கழிவுகளை உரமாக்கவும், குப்பைக் கிடங்குகளுக்குச் செல்லும் கழிவின் அளவைக் குறைக்கவும் முடியும். இதன் மூலம் சுற்றுச்சூழல் மாசுபாடு குறைவதுடன், பொதுச் சுகாதாரத்தையும் பாதுகாக்க முடியும்.

“குப்பையை உருவாக்கும் இடத்திலேயே தரம் பிரிப்போம், தூய்மையான சுற்றுச்சூழலை உருவாக்குவோம்” என்ற நோக்கத்துடன் மாணவர்களிடையே இந்த விழிப்புணர்வு பிரச்சாரம் மேற்கொள்ளப்பட்டது.

தமிழ்நாட்டில் ஆவணப்பதிவு நடைமுறைகளை எளிமைப்படுத்தும் வகையில், பொதுமக்கள் தாங்களே நேரடியாக இணையவழியில் ஆவணங்களைப் பதிவு செய்யும் முறையினை பதிவுத்துறை அறிமுகப்படுத்தியுள்ளது.

இந்த ஆவணப்பதிவு முறையின் மூலம் சார்பதிவாளர் அலுவலகங்களுக்கு நேரில் செல்லாமலேயே இணையவழியில் பொதுமக்கள் தங்கள் ஆவணங்களைப் பதிவு செய்து கொள்ள முடியும்.ஆவணப்பதிவு முறை

1. பதிவுத்துறை இணையதளத்தில் தங்களது உள்நுழைவினைத் தாங்களே உருவாக்கி மேற்படி ஆவணங்களை இணையவழியில் சமர்ப்பிக்கலாம்.
2. ஆவணத்தை எழுதிக் கொடுப்பவர்கள், எழுதிப் பெறுபவர்கள் மற்றும் சாட்சிகள் ஆகிய அனைவருக்கும் ஆதார் அட்டை பதிவேற்றம் செய்யப்பட வேண்டும்.
3. ஆதார் ஆணையத்தின் மூலம் கைரேகை அல்லது கருவிழிப் படலம் வழி ஆதார் சரிபார்க்கப்பட வேண்டும். தொழில்நுட்பத் தேவைகள்

இணைய இணைப்பு, UIDAI அங்கீகரிக்கப்பட்ட எல்1 விரல் ரேகை இயந்திரம், கருவிழிப்படலம் ஸ்கேன் செய்யும் கருவி, புகைப்படம் எடுக்க நீலநிறத் திரை (புகைப்படம் எடுப்பவரின் பின்புறத்தில் வைத்திருக்க வேண்டும்), புகைப்படக் கருவி (Webcam) ஆகிய தொழில்நுட்ப உபகரணங்கள் தேவைப்படும்.

முக்கிய அம்சங்கள்

வருகையில்லா ஆவணப்பதிவின் மூலம் இணைய வழியில் சமர்ப்பிக்கப்பட்ட ஆவணங்களை சார்பதிவாளர்கள் 24 மணி நேரத்திற்குள் பதிவு செய்தோ அல்லது திருத்தத்திற்காக திருப்பி அனுப்பியோ அல்லது நிராகரித்தோ நடவடிக்கை எடுக்க வேண்டும்.

இந்த முறையில் சமர்ப்பிக்கப்படும் ஆவணங்கள், சார் பதிவாளர்களால் தற்போதுள்ள நடைமுறையில் உள்ளபடி சரிபார்க்கப்பட்டு, சட்ட விதிகளுக்குட்பட்டு பதிவு செய்யப்படும்.

திருத்தத்திற்காக திருப்பி அனுப்பப்படும் ஆவணங்களைத் திருப்பி அனுப்பப்பட்ட நாளிலிருந்து 30 நாட்களுக்குள் தேவையான திருத்தங்களுடன் மீண்டும் சமர்ப்பிக்கலாம்.

பதிவு செய்யப்பட்ட ஆவணங்களில் சார்பதிவாளர் டிஜிட்டல் கையொப்பமிட்டு, ஆவணப் பதிவிற்காக உருவாக்கப்பட்ட பயனர் உள்நுழைவுக்கு அனுப்பி வைக்கப்படும்.

பின்னர், பதிவு செய்யப்பட்ட செய்யப்பட்ட ஆவணத்தை 60 நாட்களுக்குள் தேவையான எண்ணிக்கையில் பதிவிறக்கம் செய்துகொள்ளும் வகையில் மென்பொருள் வசதி செய்யப்பட்டுள்ளது.

60 நாட்கள் முடிந்த பின்னர், பொதுமக்கள் நடைமுறையில் உள்ள முறையின்படி சான்றிட்ட நகலுக்கு (Certified Copy) விண்ணப்பித்து பதிவு செய்யப்பட்ட ஆவணத்தைப் பெறலாம்.

ஆவணத்தின் ஒவ்வொரு பக்கத்திலும் QR குறியீடு இடம் பெறும். அதில் ஆவண எண், ஆவணத்தின் தன்மை மற்றும் பதிவு செய்யப்பட்ட தேதி ஆகிய விவரங்கள் இடம்பெறும்.

பதிவு அலுவலர் ஆவணத்தில் டிஜிட்டல் கையொப்பமிடுவார். காகித ஆவணத்தில் ஏதேனும் மாற்றம் செய்யப்பட்டிருந்தால் டிஜிட்டல் கையொப்பமிடப்பட்ட ஆவணத்துடன் ஒப்பிட்டு சரிபார்க்கலாம்.

டிஜிட்டல் ஆவணம் மாற்றம் செய்யப்பட்டால், டிஜிட்டல் கையொப்ப சரிபார்ப்பில் “X” குறியீடு தோன்றுவதன் மூலம் மாற்றம் செய்யப்பட்டிருப்பதை அறியலாம் என பதிவுத்துறை சார்பில் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது.

நிகழ்ச்சியில், வணிகவரி மற்றும் பதிவுத் துறை அமைச்சர் த. லோகேஷ் தமிழ்செல்வன், வணிகவரி, பதிவுத்துறை மற்றும் அறநிலையங்கள் துறை செயலாளர் ஜெ.குமரகுருபரன், பதிவுத்துறைத் தலைவர் ஜி.கே.அருண் சுந்தர் தயாளன் ஆகியோர் கலந்து கொண்டனர்

பாரதிய ஜனதா கட்சியின் 16-வது தேசிய தலைவராக கடந்த ஜனவரி மாதத்தில் நிதின் நவீன் பொறுப்பேற்றார். அவர் பொறுப்பேற்றதிலிருந்தே கட்சியின் நிர்வாகிகளை மாற்றும் பணிகள் தீவிரமாக நடைபெற்று வந்தன. இந்நிலையில், தற்போது தேசிய துணைத் தலைவர்கள், பொதுச் செயலாளர்கள் உள்ளிட்ட முக்கிய பொறுப்புகளுக்கான புதிய பட்டியலை அவர் வெளியிட்டுள்ளார். அதன்படி, பாஜகவின் தேசிய மகளிர் அணி தலைவர் பொறுப்பிலிருந்து (மகிளா மோர்ஷா) தமிழ்நாட்டைச் சேர்ந்த வானதி சீனிவாசன் விடுவிக்கப்பட்டுள்ளார். அவருக்கு பதிலாக சத்தீஸ்கர் மாநிலத்தைச் சேர்ந்த ரூப் குமாரி சௌத்ரி நியமனம் செய்யப்பட்டுள்ளார். தவிர, தமிழ்நாட்டைச் சேர்ந்த எம்.வெங்கடேசனுக்கு பாஜகவின் தேசிய செயலாளர் பதவி வழங்கப்பட்டுள்ளது. ஏற்கனவே பொதுச் செயலாளராக (அமைப்பு) பதவி வகித்து வந்த பி.எல் சந்தோஷும், பொருளாளராக பதவி வகித்து வந்த பியூஷ் கோயலும் அதே பதவியில் தொடர்வார்கள் என அறிவிக்கப்பட்டுள்ளது.

புதிய பட்டியலின்படி, ராஜஸ்தான் முன்னாள் முதலமைச்சர் வசுந்தரா ராஜே சிந்தியா, தீரத் சிங், ராம் மாதவ், பைஜ்யந்த் ஜெய் பாண்டா, புரந்தேஸ்வரி, ரேகா வர்மா, வரஷாபென் நரேந்திரபாய் தோஷி, பார்தி பிரவீன் பவார், மன்பிரீத் சிங் பாதல், லால் சிங் ஆர்யா, நாகராஜா, தாரிக் மன்சூர் மற்றும் மதுசந்திரகர் ஆகிய 13 தேசிய துணைத் தலைவர்களாக நியமிக்கப்பட்டுள்ளனர். அதேபோல், ஸ்மிருதி இரானி, வினோத் தாவ்டே, சுனில் பன்சால், பிப்லப் குமார் தேப், சதீஷ் பூனியா, கஜேந்திர பாட்டீல், ஹரிஷ் திவேதி மற்றும் சஞ்சய் பாட்டியா ஆகியோர் பொதுச் செயலாளர்களாக நியமிக்கப்பட்டுள்ளனர்.
தகவல் தொழில்நுட்ப பிரிவு தலைவராக பதவி வகித்துவந்த அமித் மால்வியா நீக்கப்பட்டு, அவருக்கு பதிலாக சத்தீஸ்கர் பாஜக தலைவர் தீபக் மஸ்கி நியமிக்கப்பட்டுள்ளார். இவருக்கு சமூக ஊடக தலைவர் என்ற கூடுதல் பொறுப்பும் வழங்கப்பட்டுள்ளது. தீப மஸ்கி சத்தீஸ்கர் மாநிலத்தைச் சேர்ந்தவர். இவர் முன்னதாக பாஜக மாநில செய்தி தொடர்பாளராக பணியாற்றி இருக்கிறார். பாரதிய ஜனதா கட்சியை வழிநடத்தும் மூத்த தலைவர்கள் கொண்ட மார்க் தர்ஷக் மண்டலில் பிரதமர் நரேந்திர மோடி, எல்.கே அத்வானி, முரளி மனோகர் ஜோஷி மற்றும் ராஜ்நாத் சிங் ஆகியோர் தொடர்ந்து வருகின்றனர். இது தவிர, பிரதமர் மோடி தலைமை தாங்குகிற நாடாளுமன்ற வாரியம் ஒன்றும் செயல்பட்டு வருகிறது.

இதில், நிதின் நபின், ராஜ்நாத் சிங், அமித் ஷா, ஜே.பி. நட்டா, பி.எஸ். எடியூரப்பா, சர்பானந்த சோனோவால், கே. லட்சுமண், இக்பால் சிங் லால்புரா, சுதா யாதவ், சத்யநாராயண் ஜாதியா மற்றும் பி.எல். சந்தோஷ் ஆகிய 12 பாஜக உறுப்பினர்கள் உள்ளனர்.

அன்னூர் பகுதியில் குறைவான தண்ணீரில் அதிக கொசு மருந்தை கலந்து குடியிருப்பு பகுதிக்குள் பணியாளர்கள் அடித்ததாக கூறி அப்பகுதி மக்கள் வாக்குவாதம்.

கோவை மாவட்டம், அன்னூர் பேரூராட்சிக்கு உட்பட்ட 7வது வார்டு பகுதியில் கடந்த சில தினங்களுக்கு முன்பு 3 குழந்தைகளுக்கு டெங்கு காய்ச்சல் வந்துள்ளது. இதுகுறித்து தகவலறிந்த அன்னூர் பேரூராட்சி நிர்வாகம், அன்னூர், சத்தி சாலை, உப்பு தோட்டம் ஆகிய பகுதிகளில் உள்ள குடியிருப்புகளில் கொசு மருந்து அடிக்கும் பணியை நேற்று (ஆகஸ்டு 10) தொடங்கியது.

கழிவுநீர் கால்வாய், குப்பை தொட்டி இருக்கும் இடங்கள் மற்றும் தண்ணீர் தேங்கும் இடங்களில் கொசு மருந்தை பணியாளர்கள் தெளித்தனர். மேலும், குடியிருப்புகளில் உள்ள வீடுகளுக்குள் சென்றும் ஊழியர்கள் கொசு மருந்தை தெளித்திருக்கின்றனர்.
இவ்வாறு இன்று உப்பு தோட்டம் பகுதியில் கொசு மருந்து அடித்த போது, அந்த பகுதியைச் சேர்ந்த மோகன் (வயது 65). ராணி என்கிற பிரேமா (வயது 75) ஆகிய இருவர் மூச்சுத் திணறி உயிரிந்துள்ளனர். ஏற்கனவே இவர் நுரையீரல் பாதிப்பு காரணமாக வீட்டில் இருந்தபடி சிகிச்சை எடுத்து வந்துள்ளனர்.

இந்த சூழலில்தான் இவர்கள் இருவரின் வீட்டிலும் கொசு மருந்து அடித்த அடுத்த 1 மணி நேரத்தில் மூச்சு திணறி உயிரிழந்துள்ளனர். இதனிடையே குறைவான தண்ணீரில் அதிக கொசு மருந்தை கலந்து குடியிருப்பு பகுதிக்குள் பணியாளர்கள் அடித்ததாக கூறி அப்பகுதி மக்கள் வாக்குவாதத்தில் ஈடுபட்டனர். இதையடுத்து பிரச்சனை குறித்து பேரூராட்சி செயல் அலுவலர் கார்த்திகேயன் சம்பந்தப்பட்ட இடத்திற்கு வந்து பாதிக்கப்பட்ட பொதுமக்களிடம் பேச்சுவார்த்தை நடத்தினார். அப்போது, “டெங்கு காய்ச்சலால் பாதிக்கப்பட்ட குடியிருப்பு பகுதிகளை சுற்றி 400 மீட்டர் தொலைவிற்கு மாவட்ட நிர்வாகம் சார்பில் கொசு மருந்து அடிக்க அறிவுறுத்தப்பட்டது. அதன் பேரில் தான் இந்த குடியிருப்பு பகுதிகளில் கொசு மருந்து அடிக்கப்பட்டது. இதனால் பொதுமக்களுக்கு எந்த ஒரு பாதிப்பும் ஏற்படவில்லை” என கூறினார்.

செயல் அலுவலரின் இந்த பதிலால் அதிருப்தி அடைந்த அப்பகுதி மக்கள், பேரூராட்சியின் அலட்சிய போக்கை கண்டித்து பேரூராட்சி அலுவலகத்தை முற்றுகையிட போவதாக அறிவித்தனர். இதனால் அங்கு சற்றே பரபரப்பான சூழல் உருவானது.

மக்களவைத் தொகுதி மறுவரையறைச் சட்டத் திருத்த மசோதா விவகாரம் குறித்து சென்னை கலைவாணர் அரங்கத்தில் இன்று (ஆக.08) மாலை 05.00 மணிக்கு தமிழக வெற்றிக் கழகத்தின் தலைவரும், முதலமைச்சருமான விஜய் தலைமையில் அனைத்துக் கட்சிகளின் எம்பிக்களின் ஆலோசனை கூட்டம் நடைபெற்றது.

இந்த கூட்டத்தில் தவெகவின் கூட்டணிக் கட்சிகளான காங்கிரஸ், விடுதலைச் சிறுத்தைகள், மார்க்சிஸ்ட் கம்யூனிஸ்ட் கட்சி, இந்திய கம்யூனிஸ்ட் கட்சி, இந்திய யூனியன் முஸ்லிம் லீக் ஆகிய கட்சிகளின் எம்பிக்கள் கலந்து கொண்டனர். இந்த கூட்டத்தை அதிமுக, திமுக, தேமுதிக, பாமக, மக்கள் நீதி மய்யம் ஆகிய கட்சிகள் புறக்கணித்தன.

மக்களவை மற்றும் மாநிலங்களவையை சேர்த்து தமிழ்நாட்டில் மொத்தம் 57 எம்பிக்கள் உள்ளனர். இந்நிலையில், மதிமுக சார்பில் துரை வைகோ, விடுதலைச் சிறுத்தைகள் கட்சியின் தலைவர் தொல்.திருமாவளவன், ரவிக்குமார், சிபிஐ சார்பில் சுப்பராயன், செல்வராஜ், சிபிஎம் சார்பில் சு.வெங்கடேசன், சச்சுதானந்தம், இந்திய யூனியன் முஸ்லிம் லீக் சார்பில் நவாஸ் கனி ஆகிய எம்.பி.க்கள் பங்கேற்றனர்.

காங்கிரஸ் சார்பில் ஜோதிமணி, மாணிக்கம் தாகூர், சசிகாந்த் செந்தில், பிரவீன் சக்கரவர்த்தி, ப.சிதம்பரம், கார்த்தி சிதம்பரம், விஜய் வசந்த், விஷ்ணு பிரசாத், ராபர்ட் புரூஸ், கோபிநாத், கிறிஸ்டோபர் திலக் என 19 எம்பிக்கள் கலந்து கொண்டனர். காங்கிரஸ் எம்பி சுதா, தான் கட்சிப் பணிக்காக கர்நாடகாவில் இருப்பதால் கூட்டத்தில் பங்கேற்கவில்லை எனத் தெரிவித்துள்ளார்திமுக உள்ளிட்ட கட்சிகளைச் சேர்ந்த 37 எம்பிக்கள், முதலமைச்சர் விஜய் தலைமையில் நடைபெற்ற ஆலோசனைக் கூட்டத்தில் பங்கேற்கவில்லை. இந்தக் கூட்டத்தில் தொகுதி மறுவரையறை குறித்தும், அதனால் தொகுதிகளின் எண்ணிக்கையில் ஏற்படும் மாற்றங்கள் குறித்தும் விரிவாக ஆலோசிக்கப்பட்டதாக தகவல் வெளியாகியுள்ளது.

‘பாஜகவின் ஆஃபர் கதை’

கூட்டத்திற்கு பின் செய்தியாளர்களைச் சந்தித்த தமிழ்நாடு காங்கிரஸ் கமிட்டித் தலைவர் மாணிக்கம் தாகூர், “பாஜக பல்வேறு ஏமாற்று வேலைகளை செய்ய ஆரம்பித்துள்ளது. 50 சதவீதம் கூட்டுவோம், 60 சதவீதம் கூட்டுவோம் என பல்வேறு ஆஃபர் கதைகளை கட்டிக்கொண்டிருக்கிறார்கள். இந்த ஆஃபர்களில் ஏமாந்துவிடாமல் இருக்க வேண்டும். இந்த முன்னெடுப்பு மிகப்பெரிய வெற்றியைப் பெறும்.

எங்களைப் பொறுத்தவரை தமிழ்நாட்டிற்கு எந்த விதத்திலும் துரோகம் நடக்காமல் பார்த்துக்கொள்வது மிக முக்கியம். தமிழ்நாட்டைப் பொறுத்தவரை எந்தவொரு தொகுதி மறுவரையறையும் நியாயமானதாக இருக்காது. தமிழ்நாட்டை ஏமாற்றுவதற்கான வேலைதான் இது.

உண்மையிலேயே பாஜகவும் மிகப்பெரிய அளவில் சதி செய்கிறது. இந்தச் சதியில் தமிழ்நாடு ஏமாந்துவிடக் கூடாது. ‘ஃபேர் டீலிமிட்டேஷன்’ (Fair Delimitation) என்று கூறப்படுவது ஒரு தவறான புரிதல். தொகுதி மறுவரையறையே ஒரு பெரிய சதி. தமிழ்நாட்டின் அதிகாரத்தைப் பறிப்பதற்காகவே இந்தத் தொகுதி மறுவரையறை நடவடிக்கை மேற்கொள்ளப்படுகிறது. இதை எதிர்த்து 543 மக்களவைத் தொகுதிகளையும், 39 தமிழ்நாட்டு மக்களவைத் தொகுதிகளையும் பாதுகாப்பது மிக முக்கியம். எங்களைப் பொறுத்தவரை, 543 தொகுதிகளும், தமிழ்நாட்டின் 39 தொகுதிகளும் நியாயமான பிரதிநிதித்துவத்தை உறுதி செய்யும் வகையில் பாதுகாக்கப்பட வேண்டும்.

எப்போது தொகுதி மறுவரையறை நடந்தாலும், தமிழ்நாட்டுக்கு நியாயமான தொகுதி மறுவரையறை வழங்கப்படாது. பிரதமர் நரேந்திர மோடியும், உள்துறை அமைச்சர் அமித் ஷாவும் தமிழ்நாட்டுக்கு எதிரான ஃபேக் டீலிமிட்டேஷனை தான் கொண்டு வருவார்கள்” எனத் தெரிவித்துள்ளார்.மார்க்சிஸ்ட் கம்யூனிஸ்ட் கட்சியின் சு.வெங்கடேசன் கூறுகையில், “தொகுதி மறுவரையறை தொடர்பாக 42-வது அரசியலமைப்புச் சட்டத் திருத்தம் 1976-ல் கொண்டு வரப்பட்டது. தொடர்ந்து, 84- வது அரசியலமைப்புச் சட்டத் திருத்தம் 2001-ல் கொண்டு வரப்பட்டது. அதன் காலக்கெடு வரும் டிசம்பர் மாதத்துடன் நிறைவடைய உள்ள நிலையில், தமிழ்நாடு மற்றும் தென் மாநிலங்களின் உரிமைகள், அதிகாரத்தின் வலிமை பாதிக்கப்படக் கூடாது என்பதற்காக தொடர்ந்து நாம் முயற்சி செய்து வருகிறோம்.

கடந்த திமுக ஆட்சியின்போது, அனைத்துக் கட்சிக் கூட்டம் நடத்தப்பட்டது. அந்தக் கூட்டத்தில், ‘ஃபேர் டீலிமிட்டேஷன்’ என்ற பெயரில் மாநிலங்களின் உரிமைகள் பாதிக்கப்படாமல் பாதுகாக்கப்பட வேண்டும் என அனைத்துக் கட்சிகளும் ஒருமனதாக தீர்மானம் நிறைவேற்றினோம்.

அதற்குப் பிறகு, ஏப்ரல் 16- ஆம் தேதி நாடாளுமன்றத்தில் தொகுதி மறுவரையறை தொடர்பான சட்டத் திருத்தம் கொண்டு வரப்பட்டபோது, அரசியலமைப்பின் 131-வது சட்டத்திருத்தம் தொடர்பான விவாதத்தின்போது, மத்திய உள்துறை அமைச்சர் சட்டத்தை முன்வைத்து உரையாற்றினார். அப்போது, அனைத்து மாநிலங்களுக்கும் 50% வரை தொகுதிகள் அதிகரிக்கப்படும் என்பதை ஒரு சலுகையைப் போன்று அவர் தெரிவித்தார்.

ஆனால், அந்த அம்சம் சட்டத்தில் இடம்பெறவில்லை. இருந்தபோதிலும், அந்த சட்டத்தை நாம் எதிர்த்தோம். இன்றைக்கு, அன்று அவர் கூறிய அந்த வார்த்தைகள் மீண்டும் சட்ட வடிவம் பெறப்போகிறது என்ற செய்தி நாடு முழுவதும் பேசப்பட்டு வருகிறது. இது ஒரு ஏமாற்று வேலை. ஏனென்றால், ‘ஃபேர் டீலிமிட்டேஷன் என்பது நோ டீலிமிட்டேஷன்’ என்பதுதான். அதுதான் உண்மையான ஃபேர் டீலிமிட்டேஷன். தொகுதி மறுவரையறைக் குழு இந்தியா முழுவதும் நாடாளுமன்ற உறுப்பினர்களின் எண்ணிக்கையை 522- லிருந்து 543 ஆக உயர்த்தியபோது, தமிழ்நாட்டின் நாடாளுமன்றத் தொகுதிகளின் எண்ணிக்கை 41-லிருந்து 39 ஆகக் குறைந்தது.

எனவே, தற்போது உள்ள 543 மக்களவைத் தொகுதிகள் என்ற எண்ணிக்கையும், மாநிலங்களுக்குத் தற்போது ஒதுக்கப்பட்டுள்ள தொகுதிகளின் எண்ணிக்கையும் தொடர்ந்து பாதுகாக்கப்பட வேண்டும் என்பதே எங்களது நிலைப்பாடு. இந்தக் கருத்தை அனைத்து கட்சிகளும் இன்று தெரிவித்துள்ளோம். அனைத்து கட்சிகளும் ஒருமித்த கருத்துடன் இதுதொடர்பான தீர்மானத்தையும் நிறைவேற்றியுள்ளோம். மேலும், இதுதொடர்பான தீர்மானத்தை சட்டப்பேரவையிலும் கொண்டு வருவோம் என்று முதலமைச்சர் தெரிவித்துள்ளார்” என்று குறிப்பிட்டுள்ளார்.

‘தொகுதி மறுவரையறை தேவையில்லை’

செய்தியாளர்களுக்கு பேட்டியளித்த அமைச்சர் சி.டி.ஆர்.நிர்மல்குமார், “முதலமைச்சர் தலைமையில் இன்று தமிழ்நாட்டைச் சேர்ந்த அனைத்து நாடாளுமன்ற உறுப்பினர்களின் கூட்டம் நடைபெற்றது. இந்தக் கூட்டத்தில் காங்கிரஸ், இடதுசாரி கட்சிகள் உள்ளிட்ட பல்வேறு கட்சிகளைச் சேர்ந்த நாடாளுமன்ற உறுப்பினர்கள் கலந்து கொண்டனர். தொகுதி மறுவரையறை மூலம் தமிழ்நாடு மற்றும் தென் மாநிலங்களின் உரிமைகள் பாதிக்கப்படக்கூடிய சூழல் உருவாகியுள்ளது. இதனால் தமிழ்நாட்டு மக்களுக்கு மிகப்பெரிய அநீதி ஏற்படும் நிலை உருவாகும் எனக் கூட்டத்தில் பல்வேறு கருத்துகள் தெரிவிக்கப்பட்டன.

கூட்டத்தில் நாடாளுமன்ற உறுப்பினர்கள் தெரிவித்த அனைத்து கருத்துகளையும் பரிசீலித்து, முக்கியமான தீர்மானம் நிறைவேற்றப்பட்டது. தொகுதி மறுவரையறை தமிழ்நாட்டிற்கு தேவையில்லை என்பதே கூட்டத்தில் வலியுறுத்தப்பட்டது. தற்போது தமிழ்நாட்டில் உள்ள மக்களவைத் தொகுதிகளின் எண்ணிக்கையில் எந்த மாற்றமும் தேவையில்லை என்றும் தெரிவிக்கப்பட்டது. தொகுதி மறுவரையறை மேற்கொள்ள வேண்டும் என்று இதுவரை எந்தத் தரப்பிலிருந்தும் கோரிக்கை எழவில்லை. அப்படியிருக்கும்போது, எதற்காக இந்தத் தொகுதி மறுவரையறையை மேற்கொள்ள வேண்டும்? இதனால் யாருக்கு என்ன பயன்? எனவும் கேள்வி எழுப்பப்பட்டது.

மக்களின் தேவைக்காகவே பெரிய அளவிலான மாற்றங்கள் கொண்டு வரப்பட வேண்டும். ஆனால், மக்களிடமிருந்து எந்தக் கோரிக்கையும் இல்லாத நிலையில், திடீரென தொகுதி மறுவரையறையை மேற்கொள்ள வேண்டிய அவசியம் இல்லை எனவும் கூட்டத்தில் தெரிவிக்கப்பட்டது. தொகுதி மறுவரையறை என்பது மக்களின் நலனுக்காக அல்லாமல், தேர்தல் கணக்குகளுக்காகவும் எண்ணிக்கைகளை மாற்றுவதற்காகவும் மேற்கொள்ளப்படுவதாக சந்தேகம் எழுகிறது. குறிப்பாக, பாரதிய ஜனதா கட்சியின் அரசியல் தேவைக்காக இதுபோன்ற நடவடிக்கை மேற்கொள்ளப்படுகிறதா? என்ற கேள்வியும் எழுப்பப்பட்டது.

எனவே, தற்போதுள்ள தொகுதிகளின் எண்ணிக்கையில் எந்த மாற்றமும் செய்யக்கூடாது என்றும், தமிழ்நாட்டின் உரிமைகள் மற்றும் நலன்களைப் பாதுகாக்க வேண்டும்” என்றும் கூட்டத்தில் வலியுறுத்தப்பட்டுள்ளது.

தீர்மானம்

தொகுதி மறுவரையறை விஷயத்தில், தமிழ்நாடு மற்றும் தென்னிந்திய மாநிலங்களின் உரிமையை நிரந்தரமாகப் பாதுகாத்திட தமிழ்நாடு சட்டமன்றப் பேரவையில் அரசினர் தனித் தீர்மானம் நிறைவேற்ற வேண்டும் இன்றைய ஆலோசனைக் கூட்டத்தில் ஒருமனதாக தீர்மானம் நிறைவேற்றப்பட்டது.

அத்துடன், தமிழகத்தின் 39 நாடாளுமன்றத் தொகுதிகளின் எண்ணிக்கை அப்படியே தொடர வேண்டும் எனவும் இன்றைய கூட்டத்தில் முடிவு செய்யப்பட்டது.